ՆՈՐՈՒԹՅՈՒՆՆԵՐ

Այս տարի, նոյեմբերի 28-ին և 29-ին Ռիգայում տեղի կունենա «Նոր սերունդ» միջազգային քրիստոնեական շարժման 25 ամյակին նվիրված համաժողովը: 

Համաժողովի միջոցառումների շարքում առանձնահատուկ տեղ է գրավելու «Ուխտի տապանակ» անվանումը կրող երաժշտական վեհաշուք նախագիծը: 

Նախագծի իրականացմանը մասնակցելու համար հրավիրված են լավագույն սցենարիստներ, ռեժիսորներ, պարուսույցներ ու կատարողներ Լատվիայից և այլ երկրներից: 

Նախագծի նախապատրաստական աշխատանքներին մասնակցելու նպատակով անցած շաբաթ Ռիգայում էր գտնվում նաև «Նոր սերունդ» եկեղեցու հովիվ Տիգրան Թադևոսյանը դստեր՝ փառաբանության խմբի անդամ Աննա Թադևոսյանի հետ: 

Նախագծին մասնակցելու համար մրցույթով անցան 8-9 երգիչներ: Նրանց մեջ էին հովիվ Տիգրան Թադևոսյանը և դուստրը՝ Աննան: Նախատեսվում էր, որ երաժշտական միջոցառմանը Աննան հանդես կգա մեկ կատարումով, սակայն նրան լսելուց հետո կազմակերպիչները որոշեցին, որ Աննան հանդես կգա երկու կատարումով: 

Եվս մեկ երգով իր մասնակցությունը կբերի հովիվը՝ Տիգրան Թադևոսյանը: 

Նախապատրաստական աշխատանքները տևեցին չորս խիստ հագեցված և արդյունավետ օրեր: 

Աշխատանքներ էին տարվում բոլոր երեք՝ հոգու, շնչի և մարմնի ոլորտներում: 

Մեծ ուշադրություն էր դարձվում աստվածաշնչյան ընթերցանությանը ու աղոթքներին: 

Ընթերցանությունն ու աղոթքները անմիջապես փոխում էին մասնակիցների տրամադրությունն ու լցնում էին նրանց նոր օծությամբ:

Աշխատանքները հագեցված էին նվիրումով և պատասխանատվությամբ, տիրում էր աշխատանքային մթնոլորտ: 

«Քանի որ մարմինը հոգու գործիքն է, ուրեմն այն պետք է լինի կատարյալ վիճակում»,- գտնում է Ալեքսեյ Լեդյաևը: 

Բացի երաժշտական նախագծի նախապատրաստական աշխատանքներից, հովիվ Տիգրան Թադևոսյանն ունեցավ երկու ծառայություն: 

Չորեքշաբթի օրը նա ծառայեց Ռիգայի բազային «Նոր սերունդ» եկեղեցում, որտեղ հովվում է Ալեքսեյ Լեդյաևը: 

Կիրակի օրը հովիվ Տիգրան Թադևոսյանը ծառայեց Օլգա Լեդյաևայի եկեղեցում: 

Երկու ծառայություններն էլ առանձնանում էին Տիրոջ անկրկնելի ներկայությամբ: 

Հովիվ Տիգրան Թադևոսյանը դստեր՝ Աննայի հետ արդեն վերադարձել են հայրենիք: Նոյեմբերի 28-ին և 29-ին նրանք կրկին կլինեն Ռիգայում՝ մասնակցելու համաժողովի և երաժշտական նախագծի աշխատանքներին: 

Սեփական լրատվություն